हेटौंडा/प्रजातन्त्र सेनानी बाबु गोपालदास बादे र आमा चिनिमाया बादेको कोखबाट २०२४ बैशाख ८ जन्मिएका कञ्चनचन्द्र बादे २०३६ को जनतसंग्रहकै ताका राजनीतिमा सक्रिय भइसकेका थिए । वीपी कोइराला, गणेशमान सिंहका समकक्षी राजदास बादेको प्रेरणाले राजनीतिमा होमिएका बादे १५ वर्ष उमेरमा नेपाल विद्यार्थी संघको जिल्ला सदस्य भइसकेका थिए ।
२०४४ सालमा नेपाल विद्यार्थी संघ काभ्रेपलाञ्चोकको कोषाध्यक्ष बनेका बादेले २०४७ सालमा नेवि संघको जिल्ला सभापति बनेर नेवि संघ काभ्रेलाई नेतृत्व प्रदान गरेका थिए । नेवि संघस“गै बनेपाको राजनीतिमा होमिएका उनी २०५१ र २०५८ मा गरी २ पटक नेपाली कांग्रेस बनेपाको नगर सभापति भए । २०५८ सालमा नेपाल तरुण दलको जिल्ला अध्यक्ष बनेका बादे २०६० सालमा तरुण दलको केन्द्रीय सदस्य भएका थिए ।
नेपाल ट्रेड युनियन कांग्रेस काभ्रेका संस्थापक अध्यक्ष रहेका बादे २०६४ सालमा नेपाली कांग्रेस काभ्रेको कोषाध्यक्ष भएका थिए । २०५७ मा भएको पार्टीको १० औं र २०६१ मा भएको ११ औं महाधिवेशनमा उनी महासमिति सदस्यसमेत भएका थिए । पार्टीको १२ औं र १३ औं महाधिवेशनमा काभ्रे क्षेत्र–३ को सभापति भएका बादे १४ औं महाधिवेनशनबाट बागमती प्रदेश महामन्त्रीमा निर्वाचित भएका छन् । २०३६ सालपछिका सबै जनआन्दोलनमा सहभागी भएका उनले २०६२/०६३ सालको जनआन्दोलन घाइते उपचार कोषको संयोजक भएर पनि काम गरेका थिए ।
बादेलाई स्थानीय निकायको पनि अनुभव छ । २०५४ सालमा भएको स्थानीय निकायको निर्वाचनमा कांग्रेसका तर्फबाट बनेपा नगरपालिकाको उपमेयर निर्वाचित उनी २०७० सालको संविधानसभा निर्वाचनमा तत्कालीन नेकपा एमाले काभ्रेका अध्यक्ष गोकुल बा“स्कोटालाई पराजित गरेर संविधानसभा सदस्य निर्वाचित भएका थिए । उक्त समयमा उनी उद्योग राज्यमन्त्री भएर काभ्रेको विकासमा उल्लेखनीय योगदान गरेका छन् ।
सामाजिक क्रियाकलापमा पनि उत्तिकै सक्रिय उनी काभ्रे जेसीजको सन् २००७ मा अध्यक्ष बनेका थिए । सन् २००६ मा रोटरी क्लब अफ काभ्रे बनेपाको अध्यक्ष बनेर नेतृत्व प्रदान गरेका बादे नेपाल बाल संगठन काभ्रे, नेपाल परिवार नियोजन संघलगायत सामाजिक संघसंस्थामा पनि उत्तिकै क्रियाशील छन् । बनेपा, पनौती र धुलिखेललाई खानेपानी खुवाउने उद्धेश्यले सञ्चालन भएको काभ्रे उपत्यका खानेपानी आयोजना स्टेयरिङ कमिटीको सदस्य भएर पनि काम गरेका थिए । व्यावसायिकरुपमा यातायात क्षेत्रमा लगानी गरेका बादे अरनिको यातायात सेवा समितिका पूर्वकोषाध्यक्ष हुन् । २०७४ सालको प्रदेशसभा निर्वाचनमा भने पराजित भएका उनी २०७९ मा लोकतान्त्रिक बाम गठबन्धनका साझा उम्मेद्वारका रुपमा नेपाली कांग्रेसबाट प्रतिनिधिसभा–२ अन्तर्गत् प्रदेशसभा (ख) मा प्रत्यक्षतर्फ निर्वाचित भएका थिए । नेपाली कांग्रेस संसदीय दलका मुख्य सचेतक रहेका उनी शुक्रबार समाजिक विकास मन्त्री नियुक्त भएका हुन् ।
