हेटौंडा÷बागमती प्रदेशका प्रमुख सचिव भूपाल बराललाई ५ महिनामै सरुवा गरिएको छ । अर्थ प्रशासनमा लामो अनुभव भएका बराललाई सचिवमा बढुवा भएपछि जेठ १९ गते बागमती प्रदेशको प्रमुख सचिवमा पदस्थापन गरिएको थियो ।
सोमबारको मन्त्रिपरिषद् बैठकले बराललाई अर्थ मन्त्रालयको राजस्व सचिवमा सरुवा गर्ने निर्णय गरेको हो । उनले शुक्रबारदेखि नया“ जिम्मेवारी सम्हाल्नेछन् । बराल यसअघि पनि अर्थ मन्त्रालयमा बजेट महाशाखा, राजस्व प्रशासन महाशाखा प्रमुख र आन्तरिक राजस्व विभागका महानिर्देशकका रुपमा काम गरिसकेका छन् । दिनेश घिमिरेलाई राष्ट्रिय प्राकृतिक स्रोत तथा वित्त आयोगको सचिवमा सरुवा गरेपछि रिक्त भएको राजस्व सचिवको पदमा बराललाई ल्याइएको हो । मन्त्रिपरिषद्ले लुम्बिनी प्रदेशका प्रमुख सचिव बाबुराम अधिकारीलाई बागमती प्रदेशको प्रमुख सचिवमा सरुवा गरेको छ ।
