हेटौंडा/मकवानपुर क्षेत्र नम्बर-२ (ख) का प्रदेशसभा सदस्य इन्द्रबहादुर बानियाँले आफ्नो चुनावी क्षेत्रमा सम्पर्क कार्यालय स्थापना गरेका छन् । उपप्रधानमन्त्री तथा सहरी विकास मन्त्री प्रकाशमान सिंहले शनिबार कांग्रेस वागमती प्रदेश सभापति एवम् वागमती प्रदेशसभा सदस्य बानियाँको सम्पर्क कार्यालय उद्घाटन गरेका छन् ।
उपप्रधानमन्त्री सिंहले सम्पर्क कार्यालय उद्घाटन गर्दै जनप्रतिनिधिले जनताको आवश्यकता र चाहनालाई सम्बोधन गर्न सहज पहुँच हुने स्थानमा स्थापना गर्न जरुरी रहेको बताए । देशमा जबजब जटिल समस्या पर्छ, कांग्रेसले नेतृत्व लिएर समाधान गरेको विगतका उदाहरणहरु रहेको बताउँदै उपप्रधानमन्त्री सिंहले कांग्रेसको नेतृत्वमा मात्र विकास र समृद्धि सम्भव भएको बताए ।
कांग्रेस प्रदेश सभापति एवम् प्रदेशसभा सदस्य बानियाँले चुनावको बेला मतदातामाझ गरेको प्रतिवद्धताअनुरुप कार्यालय खोलेको बताए । मकवानपुरको पश्चिमी क्षेत्रस्थित मनहरी बजारमा मतदाताको गुनासो सुन्न तथा साझा सम्पर्क थलोका रुपमा विकास गर्न कार्यालय खोलिएको कांग्रेस वागमती प्रदेश सभापतिसमेत रहेका बानियाँले
बताए ।
सम्पर्क कार्यालयमार्फत् मकवानपुर क्षेत्र नम्बर-२ (ख) का मनहरी, राक्सिराङ, कैलाश गाउँपालिका र हेटौंडा उपमहानगरपालिका वडा नम्बर-३ र १९ का मतदाताले विकास निर्माणलगायत विषयमा छलफल गर्न सक्नेछन् । सम्पर्क कार्यालय उद्घाटन कार्यक्रममा कांग्रेस मकवानपुर सभापति बुद्ध लामा, वागमती प्रदेशका युवा तथा खेलकुद मन्त्री मीनकृष्ण महर्जन, कांग्रेस वागमती प्रदेश सदस्यद्वय सन्त चेपाङ र जानुका लामा, कांग्रेस प्रदेश क्षेत्रीय सभापति एवम् मनहरी गाउँपालिका अध्यक्ष रञ्जन कालाखेती, मनहरी-७ का वडा अध्यक्ष ठाकुर तितुङलगायतले मन्तव्य व्यक्त गरेका थिए ।