हेटौंडा/मकवानपुर प्रहरीले भीमफेदी गाउँपालिकाबाट एक जनालाई अवैध लागुऔषध गाँजासहित पक्राउ गरेको छ । गोरखा घर भएका २८ वर्षीय अमिर मियाँलाई प्रहरीले भीमफेदी गाउँपालिका-२, भैंसे चेकप्वाइन्टबाट गाँजासहित पक्राउ गरेको हो ।
उनलाई प्रहरी चौकी भैंसेबाट खटिएको प्रहरी टोलीले १ सय ६० किलो गाँजासहित पक्राउ गरिएको प्रहरीले जनाएको छ । पालुङबाट हेटौंडातर्फ आउँदै गरेको प्र. ३-०१-०२३ च ८०४७ नम्बर बोलेरो चेक गर्ने क्रममा लुकाइछिपाइ ल्याएको उक्त परिमाणको गाँजा
बरामद भएपछि मियाँलाई पक्राउ गरिएको हो । पक्राउ परेका अमिर गाडीचालक रहेको प्रहरीले जनाएको छ । उनीमाथि आवश्यक अनुसन्धानका लागि जिल्ला अदालत मकवानपुरबाट ४ दिन म्याद थप भएको छ ।