हेटौंडा/मकवानपुरको इन्द्रसरोवर गाउँपालिका-३, सिस्नेरीका दुई गर्भवतीलाई सेनाको हेलिकोप्टरमार्फत् थापाथली हस्पिटल लगिएको छ । सुत्केरी हुने मिति नाघेका एक र सुत्केरी व्यथा सुरु भएक दुई गर्भवतीलाई हेलिकोप्टरमार्फत् अस्पताल लगिएको हो । बिहीबारदेखिको वर्षाका कारण सवारी आवागमन बन्द हुँदा दुई गर्भवतीलाई हेलिकोप्टरमार्फत् उद्धार गरेर अस्पताल पठाइएको इन्द्रसरोवर गाउँपालिका उपाध्यक्ष उमाकुमारी ब्लोनले जानकारी दिइन् ।
स्थानीय स्वास्थ्य संस्थाले सिस्नेरीकी २० वर्षीया सुकमाया वाइबाको ९ गते सुत्केरी हुने मिति दिएकोमा समयमा सुत्केरी नभएकी र ३० वर्षकी सुशीला घिसिङलाई सुत्केरी व्यथा लागेको अवस्थामा उद्धार गरिएको उपाध्यक्ष ब्लोनले जानकारी दिइन् । स्थानीय तहको सुत्केरी बचाऊ कार्यक्रमअन्तर्गत् पालिकाको समन्वय तथा गृह मन्त्रालयसँगको सहकार्यमा सेनाको हेलिकोप्टरमार्फत् उनीहरुलाई उद्धार गरेर अस्पताल पठाएको बताइएको छ ।