भाद्र २७, हेटौंडा–९ मा रहेको श्रीकृष्ण आदर्श सेकेण्डरी बोर्डिङ स्कुलले पठन सिपसँगै व्यवहारिक शिक्षालाई पनि जोड दिन थालेको छ ।
विद्यार्थीलाई व्यवहारिक शिक्षा दिने उद्धेश्यले विद्यालयले वार्षिक कार्ययोजना तयार पारेर विभिन्न कार्यक्रम सञ्चालन गर्न लागिएको विद्यालय व्यवस्थापन समिति अध्यक्ष नवीन केसी जानकारी दिए । वार्षिक कार्ययोजनाअनुसार विद्यार्थीलाई व्यवहारिक ज्ञान तथा सिप सिकाउने उद्धेश्यले विभिन्न कार्यक्रम सञ्चालन गरिरहेका छौं,’ केसीले भने–प्रत्येक शुक्रबार अतिरिक्त क्रियाकलाप सञ्चालन हुनेगर्छ । जसअनुरुप भदौ महिनाका दुई हप्ता कक्षा–५ देखि ९ सम्मका विद्यार्थीलाई दुनाटपरी गाँस्न सिकायौं । प्लास्टिकमुक्त बनाउने अभियानसहित बनजंगलमा पातलाई सदुपयोगका निम्ति विद्यार्थीलाई दुनाटपरी गाँस्न सिकाएका हौं ।
विद्यार्थीले बनाएका दुनाटपरी विद्यालयको क्यान्टिनमा प्रयोग हुने गर्दछ । हरेक आइतबार र बुधबार क्यान्टिनमा मम बनाइन्छ । विद्यालयका प्राइमरी लेभल इञ्चार्ज उमा मिश्र तथा शिक्षक सुनिता कार्की र कल्पना खतिवडाले विद्यार्थीलाई दुनाटपरी गाँस्न सिकाएका थिए ।
कक्षा–५ देखि ९ सम्म करिब ३ सय विद्यार्थीले दुनाटपरी गाँस्न सिकेका थिए । अतिरिक्त क्रियाकलापअन्तर्गत् शुक्रबार विद्यार्थीलाई सियोमा धागो हालेर टाँक लगाउन सिकाउनुका साथै बत्ती काट्न सिकाउने कार्यक्रम तय भएको उनले बताए ।
