भाद्र ०९, मानवसेवा आश्रमले सहयोगापेक्षी सडकआश्रित मानवहरुको उद्धार कार्य सुरु गरेको ११ औं वर्ष प्रवेशको सन्दर्भमा आयोजना गरेको साताव्यापी कार्यक्रमको दोस्रो दिन वृक्षरोपण सम्पन्न गरेको छ ।
मानवसेवा आश्रमको मुख्य कार्यालयअगाडिको कुखरेनी सामुदायिक बनमा हेटौंडा उपमहानगरपालिका वडा–९ अध्यक्ष सुकराम केसीको सभाध्यक्षता र वागमती प्रदेश बन तथा वातावरण मन्त्रालयका सचिव यज्ञनाथ दाहालको प्रमुख आतिथ्यतामा वृक्षरोपण गरी कार्यक्रम सम्पन्न भएको हो ।
कार्यक्रमलाई सफल बनाउन आवश्यक बिरुवा र प्राविधिक सहयोग डिभिजन बन कार्यालय राप्ती, मनहरीबाट प्रदान भएको मानवसेवा आश्रम अध्यक्ष रामजी अधिकारीले जानकारी गराए । कार्यक्रममा प्रदेश सचिव दाहालले मानवसेवा आश्रमले गरिरहेको कामको प्रशंसा गर्दै प्रदेश सरकारका तर्फबाट आवश्यक सहयोग रहने प्रतिवद्धता व्यक्त गरे ।
कार्यक्रममा मानवसेवा आश्रमको सेवालाई स्थापनाको समयदेखि नै निरन्तर साथ, सहयोग र अभिभावकत्व प्रदान गरेका धापटोलबासी, हेटौंडा उपमहानगरबासी एवम् अन्य महत्वपूर्ण व्यक्तिहरुको उपस्थिति थियो ।
