हेटौंडा–नेपाल आदिवासी जनजाति पत्रकार महासंघ (फोनिज) वागमती प्रदेश कार्यसमितिले ७ सदस्यीय सल्लाहकार समिति गठन गरेको छ ।
बिहीबार बसेको फोनिज प्रदेश कार्यसमितिको तेस्रो पूर्ण बैठकले फोनिजलाई ऊर्जावान बनाउन फोनिज मकवानपुर पूर्वअध्यक्ष एवम् नेपाल पत्रकार महासंघ वागमती प्रदेश महासचिव कृष्ण सारुमगरको संयोजकत्वमा सल्लाहकार समिति गठन गरेको हो ।
समिति सदस्यमा सरिता श्रेष्ठ (धादिङ), राजु चौधरी (चितवन), सुरेन्द्रभक्त श्रेष्ठ (काठमाडौं), देवकुमार सुनुवार (रामेछाप), जीवन लामा (दोलखा) र सुमित श्रेष्ठ (रामेछाप) छन् । बैठकले वागमती प्रदेश सरकारलाई धन्यवाद दिने निर्णय गरेको छ । प्रदेश सरकारले फोनिजलाई सञ्चार क्षेत्रका लागि बजेट विनियोजन गरेको र यस कार्यका लागि फोनिज मकवानपुर पूर्वअध्यक्ष मगरले विशेष पहल गरेको भन्दै विशेष धन्यवाद दिने निर्णय भएको जनाइएको छ । बैठकले प्रदेश कार्यसमितिको चौथो पूर्ण बैठक दोलखामा गर्ने निर्णय पारित गरेको छ ।
